මහේල ජයවර්ධන
ප‍්‍රින්ස් ගුණසේකර
”මා නායකත්වයෙන් ඉවත්වීමත් සමග නොයෙක් බොරු ප‍්‍රචාර යනවා. ජ්‍යෙෂ්ඨ කී‍්‍රඩකයන් මා සමග අමනාප බවට, තේරුම් කමිටුවේ බලපෑම මත හා ඉන්දීය සංචාරයේ පරාජය ඉල්ලා අස්වීමට හේතුව බවට යන සියලු කතා මුළුමනින්ම අසත්‍යයි. මම ඇත්ත කියන්නම්” මහේල ජයවර්ධන ප‍්‍රකාශ කෙළේය.
නායකත්වයෙන් ඉල්ලා අස්වීමට හේතු පැහැදිලි කරමින් ඊයේ ශ‍්‍රී ලංකා කි‍්‍රකට් ආයතනයේ පැවැති මාධ්‍ය හමුවේදී ඔහු ඒ බව අවධාරණය කෙළේය.
ශ‍්‍රී ලංකා කි‍්‍රකට් නායකත්වයෙන් ඉල්ලා අස්වීමට කල්පනා කෙළේ පසුගිය බංග්ලාදේශ සංචාරය අතරතුරදීයි. හදිසිියේම පාකිස්තාන හා ඉන්දීය තරගාවලි පැමිණි නිසා නව නායකයෙකුට ඉක්මනින් වගකීම් පැවැරීම අසාධාරණ නිසා ඒ තීරණය කල් දැමීමට සිදුවුණා” යැයි මහේල පැවැසීය.
ඉල්ලා අස්වීමට ගත්් තීරණය නිවැරැදි වෙලාවට ශ‍්‍රී ලංකා ක‍්‍රිකට් වෙනුවෙන් ගත් තීරණයක් බවත් ඉදිරියේ පත්වෙන ඕනෑම නායකයකු යටතේ සියයට එකසිය පනහක දායකත්වයක් රට වෙනුවෙන් ලබා දෙන බවත් මහේල සඳහන් කෙළේය. 2011 ලෝක කුසලාන කි‍්‍රකට් තරගාවලියට සූදානම් වීමට දැන් සිටම අලුත් නායකයකු පත් කළ යුතුයි.
නව නායකයාට කණ්ඩායම සුදුසු පරිදි සකස් කර ගැනීමට හොඳ කාලයක් අවශ්‍යයි. ඒ ගැනත් මා කල්පනා කළා.”
ශ‍්‍රී ලංකා ක‍්‍රිකට් තේරීම් කමිටුවේ බලපෑමක් මත ඉල්ලා අස්වූවේ යැයි මතයක් ගොඩනැගී ඇතැයි මාධ්‍යවේදියකු මතු කළ අදහසකට පිළිතුරු දුන් මහේල පැවැසුවේ එය පදනම් විරහිත ප‍්‍රකාශයක් බවයි.
“මෙය මා පෞද්ගලිකව හිතා ගත් තීරණයක්. කිසිදු බලපෑමක් නෑ. ඉල්ලා අස්වීම පිළිබඳ තේරීම් කමිටුවට දැනුම් දෙද්දී ඔවුන් පුදුමයට පත් වුණා.
එක්දින කණ්ඩායමෙන් ඉවත් වුණද ටෙස්ට් පිලේ නායකත්වය තවදුරටත් භාරගන්නා ලෙස තේරීම් කමිටුව මගෙන් ඉල්ලීමක් කළා. මා එයට එකඟ වූයේ නෑ.”
”එක් එක් අය ගෙන යන බොරු ප‍්‍රචාරවලට මා පිළිතුරු දෙන්නේ නෑ. බොරු ප‍්‍රචාර යවන අයගේ මනස හදන්නත් මට බෑ” මහේල හැඟීම් බරව සඳහන් කෙළේය.
කෙසේ වුවද ශ‍්‍රී ලංකා කි‍්‍රකට් පිලේ ජ්‍යෙෂ්ඨ මෙන්ම කණිෂ්ඨ කී‍්‍රඩකයන් කණ්ඩායම මෙහෙයවීමේදී තමාට සුවිශාල සහයෝගයක් ලබා දීම අගය කරන බවද ඔහු වැඩිදුරටත් පැවැසීය.
